"The Guardian" gazetasi: Samarqand zamini avval ana shu yo'llarni bosib o'tganlar – buyuk hukmdorlar, olimu savdogarlarni eslatadi

LONDON, 31-oktabr. /"Dunyo" AA/. Britaniyaning mashhur "The Guardian" gazetasida atoqli yozuvchi va jurnalist Kerolayn Edenning qadimiy Samarqand shahri haqidagi maqolasi chop etildi, deb xabar qilmoqda "Dunyo" AA muxbiri.

Unda O'zbekistonning turizm salohiyati, madaniy-tarixiy merosi haqida batafsil ma'lumotlar keltirilgan. Muallif Samarqand shahrining me'moriy obidalarini ziyorat qilishdan olgan taassurotlari bilan o'rtoqlashadi.

"Samarqand Markaziy Osiyo shaharlarining eng qadimiysi, tarixiy Ipak yo'li chorrahasidir. "Ipak yo'llari" tasavvurini uyg'otuvchi shahar Samarqand sayohatchilar ko'z o'ngida jonlanayotgandek. Uning ko'chalarida sayr qilib, ular bu yerda o'zaro bog'langan tarix va madaniy xilma-xillik nafasini har qadamda his qiladilar", – deb yozgan muallif.

Maqoladan Shohi-Zinda majmuasiga oid muhim ma'lumotlar ham o'rin olgan. "Majmua ichidagi maqbalar 14-15-asrlarda bunyod etilgan. Har bir maqbara o'ziga xos voqealardan hikoya qiladi. Bu yerdagi muhitga qadimiy ruh uyg'unlashgan. Bu sayyohlarga o'tmish bilan bog'liqlik xotiralarni his qilish imkonini beradi", – deyiladi nashrda.

Kerolayn Eden Go'ri Amir maqbarasi haqidagi faktlarga ham murojaat qilgan. Qayd etilishicha, maqbaraning 30 metr balandlikka ko'tarilgan gumbazi Shohi-Zinda majmuasidan kam emas. "Ushbu maqbarada nomi tarix solnomasida mangu qolgan Sohibqiron Amir Temurning buyukligi va qudratini his qilish mumkin", – deb yozgan u.

Samarqand zamini avval ana shu yo'llarni bosib o'tganlar – buyuk hukmdorlar, olimu savdogarlarni eslatadi. Ularning ushbu ajoyib shahar madaniyati va urf-odatlari bilan chambarchas bog'langan hikoyalari bu erga afsonalarga tegish va ko'p asrlik tarix havosidan nafas olish uchun kelgan odamlarning qalbida yashashda davom etmoqda.

Maqolada shuningdek, Londondagi Britaniya muzeyida 2025-yilning martigacha ochiq bo'lgan "Ipak yo'llari" ko'rgazmasiga tashrif muhimligi haqida so'z boradi. "Ko'rgazma 300 dan ortiq eksponatlarni, jumladan, qadimiy Samarqand shahrini namoyish etuvchi ta'sirchan voqelikdir", – qayd etgan britan yozuvchisi.